بسم الله الرحمن الرحيم
ضحية خيآنه يعود لكم من جديد
طبعا يا شباب الحديث عن طارق التايب ذو ( شجون ) .. وعند بعض اللي ما يحبونه ( ذو سجون )
حنا عارفين طبعا إن الموضوع انتهى وطاارق للأسف رحل لكن شيء بالنفس ونبي نقوله !!
يقول لي واحد من الجماعة مع إنه نصراوي لكن ( فاهم كوره ) << سبحان الله أذكروا الله يا جماعة
الرجال قال كلام والله إنه صحيح .. يقول : طارق التائب ما أعطي فرصة في الهلال !! وشلون ما أعطي فرصة ؟!
ما أعطي فرصة لأنه من يوم حضر للهلال والهلال يلعب في أغلب مبارياته بمهاجم واحد !! ودائما هذا المهاجم
مراقب بشدة في جميع المباريات .. ومع ذلك طارق صنع كثير من الأهداف ..!!
لكن لو عطيتوا طارق فرصة وهي أنكم تحطون أمامه مهاجمين اثنين ويعملون مساحات كان شفتوا العجب العجاب !!
أ.هـ << متعوب عليها
^^^^^^^^^^^^^^
كلام بالصميم من وجهة نظري !!
يعني فعلا طارق يلعب وأمامه مهاجم واحد ومع ذلك يمرر كور خطيره .. كيف لو كانوا مهاجمين اثنين ويتحركون
أعتقد كان صار كلام ثاني !!
المشكلة يجونك بعض الجماهير يقولك طارق استعراضي وطارق مدري وش فيه وهذولاء بعضهم متأثر بالجماهير الصفراء << غير رفيقي اللي تو
وبعضهم ( وهم كثير ) مع الخيل يا شقراء !!!
يعني طارق الآن يمسك الكوره في المنتصف يدور أحد يعطيه الكوره ما يلقى لأنه ما فيه قدامه إلا ياسر
وياسر غالبا واقف والمدافع خلفه ولا يتحرك !! طيب كيف يناوله ؟؟؟! فيضطر إنه يتأخر عشان تجي المساندة
من الوسط أو الأظهرة ..! وهذا اللي جعلهم يتهمون طارق بتأخير اللعب وهو طبعا ما له ذنب في التأخير بالعكس
نشوفه تنقطع بعض مناولاته بسبب محاولته اللعب بسرعة ..!
طبعا أنا ما أقول إن طارق ما نزل مستواه عن الموسم الماضي .. لكن أقول يبقى في أسوأ حالاته ممتاز
وبطريقة لعبنا هذي ما فيه أحد يقدر يقدم أكثر من ما يقدمه طارق !!
أرجوا إنه ما أحد يطلع لي واحد الحين ويجيب لي طاري النيبالي أبو حظ عشان ما يجيني غثيان
هذاك اللي في عز مستوياته ما يصنع إلا كوره كورتين بالمباراة !! والكوره تموت بين رجليه وتثلج من بروده !!!
أما طارق فـ ياما صنع من كور لكن المشكله ما فيه أحد يستثمرها بشكل صحيح
والمشكلة إذا جاك واحد بينتقد طارق يقول كم صنع من هدف ؟؟! أنا أقوله كان تبي كلام مدربين خذ كلام مدربين :
صانع الألعاب لا يحاسب كم صنع من هدف .. بل يحاسب كم صنع من كوره !!
يعني وش ذنب طارق إذا صنع لياسر أو الشلهوب أو الزوري أو غيرهم ولا سجلوا ؟؟!
^^^ هذا كلام مدربين ولا هو كلام مندسين يا مندس ياللي على راسك ريشة !! ليش حطيت يدك على راسك يا ولد كفشوووووه
أما اللي استغلوا ضربة الجزاء عشان ينتقصون من طارق أقولهم :
ضربة الجزاء اللي ضيعها طارق أو الشلهوب أو ما صدها الدعيع .. هي في الأول والأخير ضربات حظ
ما تنزل من أسهم أي لاعب لأن المسألة ( حظ ) وأعظم اللاعبين في العالم ضيعوا بلنتيات ولا نقص من قدرهم !!
لكن مسألة إن طارق كان يستعرض .. فيه شيء خفى عن الجميع وطارق ذكره لبعض الجماهير وهو : إن طارق
من عشر سنوات وأكثر وهو متعود إن الكوره ما تطلع من رجله إلا لازم يلتفت !! فالشيء هذا صار عنده عاده
قبل يكون استعراض يعني صار يسويها كذا لو ما يبغى يستعرض .. وهذا اللي حصل في البلنتي !!
والمسألة ما هي تدوير أعذار بقدر ما هو الواقع والواقع مثل ما قلت إنها في الأول والآخر ( حظ ) !!
بالمختصر يا شباب .. صانع الألعاب اللي من الطينه هذي اللي يحطك أنت وضميرك قدام المرمى نادر في العالم كله !!
كيف إذا كان يجمع مع الميزة هذي ( الـمـتـعـة والإثـارة ) << هذا اللي ندور !!
يعني يا جماعة حنا ما شفنا كرة القدم ولا شجعنا إلا عشان ( نستمتع ونوسع صدورنا ) وإلا ما هو طايلنا دراهم ولا شيء
بالعكس حنا اللي ندفع ونحضر عشان في الأخير نوسع صدورنا ونستمتع !! والمتعة ما تتعارض مع البطولات
وبرشلونة أقرب دليل !!
وإلا وش اللي خلانا نعشق يوسف الثنيان وسامي الجابر وهذاك الجيل إلا إنهم جمعوا بين المتعة والبطولات !!
يعني والله لو خيرونا بين إننا ناخذ بطولات الموسم كلها بالطريقة اللي تحرق الأعصاب لآخر المباراة
لين يجي هدف وإلا فاول .. أو نأخذ ثلاث بطولات فقط بس بهجوم وإثارة ومتعة تجبرك على المشاهدة !؟
والله نختار الثانية بدون تردد !!
وحنا أصلا كنا كذا مع هذاك الجيل الراائع لين جانا بعدهم مثل ما قال صالح السليمان العقيم باكيتا اللي دمر الهجوم
والمتعة في الهلال !! << كلام كنت أقوله عن باكيتا قبل سنوات وشفت معارضة واعتراضات وشد عضلي !! والآن جاء
صالح السليمان في مقاله الأخير ووافقني عليه فبيض الله وجهك يا صالح
لكن في المواسم الثلاثة الماضية جانا طارق وأعاد لنا ذكريات ذاك الجيل ورجعت لنا معه المتعة المفقودة
وتمريرات الكبار لين صاروا خصومنا يحسبون له ألف حساب << وما ينكر هذا إلا مكابر ..!
لكن للأسف أقدر أقول شيء واحد .. والله ما عرفوا قدرك يا طارق
والله نبي نتحسف ونعض أصابع الندم على التفريط في نجم بهذا الحجم !! مو لأننا نبي نضيع من دونه .. لا !!
الهلال ولله الحمد بطل في كل الأزمان مع أي لاعب كان ومع أي مدرب كان ..! لكن نبي نتحسف لأنه صعب جدا
ونااادر أننا نلقى لاعب بمواصفات التايب يجمع بين التمريرات الحاسمة والمتعة الحقيقية !!
أخيرا لك يا طارق
نحاول نكذب على أنفسنا ونقول ما راح لكن يبدوا إنه هذا الواقع المرير وكلمة ما تمنينا نقولها أبدا لكن اليوم نشوف
إننا نقولها غصب علينا .. ( الوداع يا سيد الإمتاع )
ما أصعب لحظات الفراق لكن هذا هو حال الدنيا الأوقات الجميلة دائما ما تطول !!!
لكن .. قل آمين .. عسى ربي يسعد قلبك ويوفقك على كثر ما أسعدتنا وأمتعتنا ..!
رووح يا شيخ والقلب داعي لك ..!!
(( لحظة وداعك ))
لحظة وداعك تغرق العين بالدمـع .:. ما ألومها لو يقضي الدمع حسره
تبكيك يا طارق ولو لامها السـمـع .:. قالت له الفرقى على القلب جمره
تبكيك لا منه حضر والتقى الجـمـع .:. في ساحة الملعب مع القوم بكره
وصار الخصم يقرب من الفوز له طمع .:. راح الذي كانوا يهـابون قدره
المتعة وحطوا على بابها شمـع .:. أو غسّلوها وادفنوها بـحـفـره
.
